阿里巴巴收購南華早報媒體事業，付鈔20.61億，貴唔貴呀，睇落就貴，因為南早媒體包括幾張報紙、幾份女性男性雜誌再加數碼平台等等，年賺1.23億元，相等於P/E 16.77倍，以今時今日恒生指數成份股PE低於10倍計，阿里巴巴係付出咁高溢價，可能係睇好前景啩。1993年郭鶴年集團以26.2億元買入南早34.9%權益，即係當年南早價值75.9億，現在郭氏集團佔南早74%股權，總成本一定超過26億，但出售南早媒體業務後，最多只分得15億多啲，好彩南早公司（583）還持有若干物業，他日一一賣晒或起樓出售，或者拉勻條數，仍然投資有利，但歷時22年以上噃，呢筆投資實在係浪費機會成本。
馬雲有乜把炮去將南華早報媒體業務壯大，恢復1990至1994年代之黃金時代威風？大概係要靠網站，印媒已無復當年勇，南早之「搵食報」（招聘廣告）已大為失色，廣告殺着欠奉，好難賺大錢了。亞馬遜買入「華盛頓郵報」，出第一招就係削減成本，將大本營搬去面積較細小嘅大廈，南早鰂魚涌寫字樓編輯部早已售予太古地產發展，難以效法「華郵」。
對馬雲阿里巴巴嚟講，21億港紙濕碎到極，當買件玩具啫，銀紙應非考慮因素。華人商人辦報，總係要望住當權派，日日驚住手下編輯犯上天條，所謂新聞自由，全世界現實啲講，只係控制性大股東之新聞自由，所有編輯一概聽命，否則被炒。梅鐸之新聞集團當然係由梅鐸話晒事，佢唔鍾意民主黨，旗下霍士電視過去八年來一直日日鬧奧巴馬，你估完全係編輯自主呀？「紐約時報」至今仍然行運，大股東家族雖然面對經營困難，仍然堅持新聞獨立自由，唔肯賣盤；「華爾街日報」原來大股東因家族分家產，出售控制權俾梅鐸，適逢報紙性格與梅鐸差不多，故相安無事。阿里巴巴買入南早之後，以後報紙會唔會聽話一啲？好難講，當大老闆與北京要員相熟得緊要，總編輯係有可能突然間收到電話嘅。馬雲常在杭州北京行走，在重要時刻（例如下一次政改之類）收到電話，完全係意料中事，至於呢啲訊息如何傳達到編輯部，就各師各法嘞。呢啲嘢，好難畫公仔畫出腸。總而言之，愛國華僑郭鶴年將報紙賣俾內地愛國人士馬雲，中央最高興。