世俗觀念裏，女人比男人浪漫，算盤如果打得響，依循的方式也是另一套，柴米油鹽這些生活瑣碎，在街市買豬肉買芥蘭固然計得精刮，可是你問她有嚿錢會用來置業抑或掃香奈兒，答案通常令人眼前一黑。所以劉黎兒文章裏的陽具用家，居然個個經濟實惠，簡直吐氣揚眉為婦女界爭光，罔顧無關重要的枝枝葉葉不在話下，分寸拿揑之準確更是嘆為觀止。其中「大部份女人也不重視長度，較在意是否夠粗」，有番咁上下「零為肉碎」體驗的男同志當然十分同意，但女將們叻到開出「理想長度14.77公分，直徑4.03公分」的數口，卻教我慚愧得面無人色，差一點要學日本武士那樣切腹謝世。大佬啊，又不是做人世，齊頭15×4不好麼，何必奄尖到這種乞人憎的潔癖地步，因住超標的粗長派和斤両稍為不足的短幼族齊齊罷工，睇閣下的崇高理想能夠堅持多久！
周星馳「做人如果冇夢想，同條鹹魚有咩分別呀」耳熟能詳是一回事，擇偶和擇床伴卻只能撥進睇餸食飯範疇，做到飯來張口的境界雖然嫌濫，會被眼紅的八婆咀咒「睇個淫婦幾時鯁死吖嗱」，但有粥食粥不啻是健康的生存之道，留得青山在，不怕冇佬𡁻。你自幼繪形緝拿的白馬王子，未必有血有肉有人性，縱使15×4先生真的在大家芳華正茂的歲月畀你撞到，殘忍講句，你揀人人揀你，他也有權掂行掂過視你若隱形，直筆甩投向別的女子或男子懷抱。俗語「騎牛搵馬」非常難聽，真正的務實主義者則會反問，那有什麼問題，你又知騎吓騎吓17×5的大哥哥或13×3的小弟弟，唔會騎出另一番樂趣？