八達通嘅發卡量超過2,900萬張，全香港市民每人銀包最少有1張，八達通既然同香港人息息相關，企業管治自然要更高規格，難怪佢哋非執行主席一職，繼續由獅子行前大班坐鎮。
八達通噚日宣佈，委任滙豐銀行前主席、70歲嘅艾爾敦為非執行主席，接替已擔任此職5年、本月底榮休嘅施德論。無獨有偶，施德論亦係滙豐前主席，1999年艾爾敦正好接替施德論出掌滙豐銀行主席。
八達通行政總裁張耀堂認為，能夠委任艾爾敦擔任非執行主席，真係「深慶得人」，佢又讚賞艾大班與即將卸任嘅施德論，同為金融市場「德高望重嘅兩位重量級bankers」。
艾爾敦係紅褲仔出身嘅賓架，銀行業經驗超過40年，曾於2004年預警豪宅樓市有泡沫，被外界譽為「有良心銀行家」。2005年佢「登六」卸任滙豐大班後，2011年艾老獲滙控（005）行政總裁歐智華力邀出山，擔任中東滙豐銀行非執行主席至今，佢亦身兼滙豐阿曼主席與來寶集團獨立非執董。