有3萬會員嘅教聯會近排以月租過10萬租咗觀塘商廈一個高層海景單位，開咗間可以畀教師聚腳嘅新架步「T Club」（T指Teacher，圖），有本地咖啡店PREGIO進駐，有埋午餐同晚餐供應，會員可以book房開會或者開埋生日會，唔知教師們like唔like？
T Club今日正式開幕，執行總監林樂話8月就有呢個構思，睇咗約20個單位，最後揀定呢度。新架步位於觀塘成業街6號泓富廣場23樓，向南望到維港海景。除咗周一及過年休息，其他日子中午12點開門，周五及六關門時間由晚上9點延至11點，方便老師夜蒲，呢個架步下午4點半前都會開放畀非會員。