恒生銀行（011）前大掌櫃陳國威（Patrick）2009年辭任該行執董兼財務主管後，走咗去新鴻基地產（016）出任執董兼首席財務總監，佢今年10月辭任新地後，動向一直未明，可能Patrick始終覺得，都係做咗14年嘅恒生最好，卒之回巢。
Patrick喺恒生嘅新任務，唔係執掌財務，而係新設立嘅大中華業務主管，直接向恒生一姐李慧敏滙報，明年1月4日正式返工。
現年59歲嘅陳國威，1995年加入恒生，2005年升任為執董，呢次重返舊舖，稍後會否再獲委任為董事呢？恒生公關大員回應，該行所有高管嘅任期同委任，均由董事會決定，陳氏係該行高管團隊成員。
根據公佈，Patrick將會專注恒生內地同跨境業務發展，至於現時恒生（中國）一哥林偉中，據聞繼續向一姐李慧敏滙報。