一首《喜歡你》，叫特首和家強同陷泥淖，本來以為要選2015「關公」危機，剪卡刪App事件可穩穩陣陣坐亞望冠，哪知年尾流流，又俾「雙眼動人、笑聲迷人」的特首「威」多次！
企業間就到底應否參與社交媒體攻防戰的內部辯論已不知存在多久，到最後，大家都寧取中間路線，營運層面無得躲避的，或者推廣上真有需要靠社媒，想唔參與都唔得，就無計去馬啦，否則在企業層面，又無甚在社媒宣傳需要的，就無謂身先士卒，勞民傷財，若即若離睇定啲就是了。過去幾年，這個看法在企業間其實幾普遍。
老老實實，即使有捲起衫袖上戰場的，所post亦甚保守低調，不痛不癢，「行」到讚又無人讚，鬧又輪唔到佢，like來like去都是同樣那十幾二十人，如無意外應是公關部之友，費這種勁去吊這種鹽水，也許算是一種養兵千日，盼用在一時吧。
企業保守，反之官場政界就比較勇，田毛毛幾熱衷抽水唔使多講，抽抽下仲一成為今年YAHOO 搜尋人氣十大，以68歲高齡，在網絡同林日曦、何韻詩、盤菜瑩子等齊名，唔到你唔服，也許是政經界最成功例子。葉劉都想㗎，無奈所託非人，俾admin跣到攤攤腰。財爺中規中矩，穩陣得來唔算老套。香港警察fan page開頭俾人噓爆，但早前的的士接生事件，都叫做有四千幾個like吖，回應也是正面的多，加油啦，未嘗無得做嘅。
至於我們的特首，也開了個fb專頁，有專欄作家轉達專家之言，說叫他乾脆不要開算了。其實要人真心like ，玩唔玩得起，公眾形象夾唔夾係決定性因素，以梁生雙眼之動人，幕僚之生性，只可以話係件超級迎難而上嘅工程囉。
彭瑪莉
mailto:[email protected]