政府新聞處噚日安排傳媒飯敍，請咗上任一個月嘅創新及科技局局長楊偉雄出席。楊偉雄被問到去立法會有乜感受時笑言：「論盡嘅新聞大家都睇到，再講就仲論盡。」佢話經驗唔夠，好似開會唔記得閂電話，強調呢啲事唔可以再發生。佢同時都要習慣議員嘅作風，因為有啲議員私下傾偈冇乜嘢，但喺立法會就用另一個方法對佢，笑稱立法會可以訓練EQ喎。
預告開fb 暫不公開
楊偉雄預告會開facebook，但暫不公開，因為若然收到幾千個messages就「死梗」。佢強調上任後馬不停蹄，自稱默默耕耘而非吹噓之人，希望大家通融佢嘅做事作風。至於幾時有副局同政助？佢話人選係親自物色，之前預料一兩周內公佈係樂觀咗，因為涉及好多程序，但強調唔係人選有問題。