【本報訊】江湖猛人、綽號「上海仔」的郭永鴻，前日在尖沙嘴半島酒店嘆下午茶時遇襲，事後自行到跑馬地養和醫院求醫。昨凌晨他由大批手下陪同出院，只見他右臉腫起，右眼角貼上膠布，但自己揚言只是「跣倒撞親枱角」，自己「冇嘢，幾精神」，「唔使縫針，唔知幾靚仔！」
記者：江寶龍 李家傑
曾任黑幫「和勝和」坐館的上海仔，遇襲後由大批手下護送到養和醫院求醫，酒店報案。事件恐掀起一場江湖廝殺，警方接報大為緊張，派出反黑組人員到酒店及醫院調查，鎖定疑兇是一名30至40歲短髮男子，懷疑是大圈仔。
兇徒手戴鐵蓮花
警方調查發現當時上海仔獨坐一枱，其手下則坐另一枱，兇徒走近上海仔，揮右拳襲擊上海仔臉部，兇徒手上戴有類似「鐵蓮花」或戒指等尖硬物件，造成傷痕。案件列作襲擊致造成實際身體傷害，油尖警區反黑組正進行調查。
《蘋果》記者當晚到醫院了解，其間上海仔一名手下帶來一套白色中山裝，供上海仔替換出院。約至昨凌晨2時許，上海仔穿着該套白色中山裝，在近10名手下陪同下出院；伴在身旁的包括現任坐館肥堅，以及競選2017年坐館的阿祖。只見上海仔右臉腫起，右眼角貼上膠布，他神態自若，似未被遇襲事件嚇怕。
不過，上海仔甫步出醫院門口，即找來《蘋果》記者說：「《蘋果》喺度我同你傾偈」，揚言自己只是「撞親枱角，冇事！」他點名批評另一家傳媒機構，描述他的傷口長達7吋是「作大」、「公器私用」，並滿腹牢騷說：「7吋長？何來7吋長？佢仲知得快過我……有啲話隊冧，我幾精神睇吓！……7吋長嗰個嘢交唔到差啦！」
問記者「我有冇嘢」
上海仔不斷強調自己「撞親枱角、冇嘢、幾精神呀！」又指着眼角傷勢，反問在場記者：「我有冇嘢？撞到枱角有冇嘢呀？」記者追問他如何撞到枱角，又問警員有否聯絡他？他卻指自己「跣親」，又稱：「（警方）聯絡又點？我撞到枱角之嘛！」
記者續問他需否縫針、會否有後遺症？他說：「唔使縫針」，又指着自己臉頰答道：「冇，撞到枱角啫，有咩後遺症？唔知幾靚仔！」之後他登上平治房車，離開前還特意放下車窗，補上一句：「多謝關心！」