色字頭上一把刀，紐約人前鋒D威廉士（Derrick Williams）就因為一夜風流而損失慘重。日前佢就帶兩名艷女返屋企過夜，結果第二朝就發覺唔見咗成75萬美金（約585萬港元）嘅珠寶；大嗱嗱幾乎唔見兩成人工，𠵱家紐約警方就通緝緊兩位女子，仲懷疑佢哋係利用美色犯案嘅慣犯。
帶兩女返豪宅被偷珠寶
上兩個月香港就發生有位伯伯因為嫖妓而被妓女偷「撈」，結果虛報被打劫，最後俾警方拆穿，法官仲要求佢向老伴道歉㖭。日前就發生個NBA版本，事件時間喺上周五，紐約人就作客76人大勝107:97，D威廉士就獨取17分，表現都算唔錯，佢當晚返到紐約後就去夜蒲，喺一間夜店就結識兩名女子，仲帶佢哋去自己位於百老匯大街嘅豪宅度狂歡，當晚發生咩事就只有佢哋三個人知，但事後嘅瘀事就通晒天。
D威廉士醒後就發現自己屋企嘅LV珠寶盒同盒內一批珠寶唔見晒，總值75萬美金。事後佢就報警，紐約警方就通緝緊呢兩位女子。唔知係唔係破財影響心情，上周六主場對公牛，雖然球隊都贏107:91，不過D威廉士就只拎到九分。記者賽後就問佢呢單案，D威廉士就話警方調查緊唔方便透露。
24歲嘅D威廉士都算運滯，11年以NBA榜眼身份加盟木狼，但限於六呎八吋身高打大前鋒好蝕底，打咗兩年木狼兩年帝王都冇咩料到，今季以400萬美金年薪加盟紐約人，轉打第六人表現都有啲回勇；但今次失珠寶，差唔多損失近兩成人工。而且因為兩位女子用假名，要追捕有啲困難，睇嚟D威廉士要搵番啲珠寶真係凍過水。