唔少政界中人呢排同花生友傾開俗稱「網絡23條」嘅版權修訂條例，都有啲質疑咁問：其實係咪真係通過咗呢條修訂，對網民嘅保障仲衰過𠵱家呢？皆因佢哋話呀，新修訂列明咗幾大豁免，相對𠵱家乜都冇保障，其實好好多㗎喎，何解大家點解唔肯畀法例通過咗後先再完善？花生友回應，莫非因為3個數目字？大家聽完，無言以對！
就係因為689，令廣大市民冇得唞。有泛民中人私下講過，查實修訂條例明顯有啲保障多過以前，可惜𠵱家嘅特首係梁振英，大家根本唔信佢肯畀政策局喺通過咗之後、再就住泛民所提嘅修訂建議，完善番條草案，單睇資訊科技局議員莫乃光，最初都係支持草案就可以見到，其實草案唔太差吖，否則佢又點肯點頭？
打開缺口 CY乜都做得出
查實花生友做呢個總結，唔係無的放矢，至少仲有另外一個例子，就係高鐵一地兩檢呢個爛攤子。查實當初通過高鐵撥款，都提過要一地兩檢，而要實行，一定喺法律上有啲調節，但內地人員執法範圍，都係局限喺某個圈子。
有政界中人就同花生友講，𠵱家唔少人擔心，一旦將內地法律納入《基本法》，一國兩制肯定受損，但講嚟講去講唔到，具體係點樣損法喎。大家聽到嘅只係有啲人一味話，打開咗呢個缺口就弊傢伙，其實由此推論，依舊係信心問題，即係根本唔信梁振英同梁班子，覺得佢乜都做得出。
花生友覺得，如果單單嘢都因為梁振英而唔成事，其實都幾費時失事，查實係咪換咗個特首，一切更easy？
花生友
周二、四刊出