隔牆有耳:唐唐陪囡囡排隊嘆咖啡 - 李八方

隔牆有耳:
唐唐陪囡囡排隊嘆咖啡 - 李八方

無官一身輕,加上九龍塘嘅唐宮都完成復修,一家大細有番安樂窩,難怪唐英年每次出現,都優哉游哉。
八方同事喺前日下晝3點左右,就見到一身便服look嘅唐唐,陪太太Lisa同兩位千金,喺中環置地廣場地下嗰間coffee shop排隊買咖啡,排吓排吓唐唐撞到個朋友,索性企埋一邊吹水,唐太就同兩個囡囡喺度等,唔經唔覺都傾咗成10分鐘㗎,而囡囡亦都買到咖啡暖吓身,但一向鍾情紅酒嘅唐唐,就冇預到自己嗰份喎。唐唐一家四口其後到地面等車,佢哋邊等車亦邊傾偈,最後車到嘞,唐唐好細心咁lady first,畀女士上車先。