華置（127）旗下西半山豪宅干德道55號璈珀銷售中，累售6伙，噚日賣出其中1伙就巴閉嘞，係11樓A室，實用2,758方呎，以1.24億元成交，呎價4.5萬元，創項目成交價與呎價新高。賣價仲靚過隔籬由信置（083）賣緊嘅干德道53號Cluny Park，信置個盤，暫時最高成交價都只係1.13億元。
咁邊位買家咁鍾意璈珀呢？原來係自己友嚟嘅。華置噚晚發出通告公佈，買入呢個單位嘅買家係公司非執行董事劉玉慧，即係大股東劉鑾雄（大劉）胞妹。
其實大劉親屬好友過去都有捧華置場，好似華置旗下位於灣仔嘅壹環，大劉胞妹劉玉珍早於2012年初以902.2萬元，買入23樓一個單位。大劉女友陳凱韻（甘比）前年亦買入40樓一個實呎848呎嘅單位，涉資2,270萬元。