呢排政商界中人都熱捧《星球大戰：原力覺醒》，早前財爺曾俊華都同一班受助家庭入場睇戲，原來特首梁振英嘅千金梁齊昕都有湊熱鬧，佢喺Instagram貼咗幾張相，其中一張見佢踢拖戴黑超、紮馬兼咬唇，蹺住白兵，好似想「收兵」嘅相，姿勢一流，估唔到睇戲都睇得咁有戲味。
話老竇同自己似樣
齊昕阿哥傳昕本來喺外國讀書，相信返港過聖誕，所以齊昕留言話係陪對方睇9點早場，果然係廿四孝阿妹！唔少網民對齊昕着咗大兩個碼拖鞋好有興趣，唔通因為睇早場太早出門，着錯咗屋企人嘅鞋？
雖則齊昕同媽媽唐青儀關係似乎麻麻哋，但係佢對老竇一直都好好，日前仲貼咗梁振英嘅年輕照，話好似自己嘅小時候。
齊昕今次亦都有貼出同CY嘅合照，齊昕話因為冇化妝，所以用圖案遮住自己個樣，陪完阿哥又𠱁老竇，真係抵錫！