上周六NBA常規賽，疲態盡現嘅公牛以91:107輸畀紐約人之餘，仲爆出占美畢拿（Jimmy Butler）唔妥教練凱保（Fred Hoiberg、小圖）嘅消息。
上周五打完四加時輸畀活塞，公牛成班球員就要「背靠背」作客紐約人，真係攰到腳軟；凱保賽後就嫌班球員表現唔好，仲話佢哋跑唔郁。今場拎得12分嘅畢拿賽後就忍唔住發火，話係凱保督師不力，幫唔到球隊打出應有表現；其實佢唔係第一次批評凱保，月初就試過拎凱保同前教練泰保杜（Tom Thibodeau）嚟比較。雖然畢拿咁講，可能只係顯示自己嘅領導能力爭做大佬，但有傳媒話佢公開談論球隊內政，好可能會得罪球隊總經理囉。
