體壇拾趣：港籃硬碰硬揚威粵港盃

粵港盃男子籃球賽噚晚喺廣東省河源體育館續演次回合，作客嘅港隊雖然有李琪受傷缺陣，仍然打出爭氣波，今場雖然輸69:71，但兩回合計仍以158:152，六分之差捧走首屆冠軍。
上周五首回合領先廣東89:81嘅港隊，雖然有李琪上場俾對手打爆嘴，次回合要缺陣，但港隊即刻重召鄭錦興幫手。噚晚賽事安排喺可以容納5,000人嘅河源體育館舉行，入座率高達九成五，仲安排樂視做直播㖭，可見賽會都好重視。

廣東隊三人五犯離場

上場錄得全場最高24分嘅陳兆榮，今仗被嚴密防守下，上半場「食蛋」；港隊之後換入鄭錦興，一上場即攞五分幫港隊追平15:15，佢有次射罰球期間，廣東球員竟然叫在場球迷打氣，結果俾球證警告。半場落後34:36嘅港隊，下半場面對更多身體碰撞，第三節一度落後15分；不過，面對對手粗野攔截，港隊博到三個廣東球員五犯離場，結果港隊憑鄭錦興攻入全隊最高17分，追至69:71完場，以總分158:152捧走冠軍。阿興賽後話手踭仲有痛，冇諗過打咁耐，港隊教練安慶健就話會用原班人馬參加出年一月九日作客澳門嘅港澳埠際賽。