隔牆有耳：
金魚鬥一番　飄移有分加 - 李八方

唔少人都會養魚，但有冇諗過養魚都有比賽？噚日喺九龍灣零碳天地就有一場金魚界嘅龍爭虎鬥，60條「協會系」蘭壽（圖）爭艷鬥麗。

蘭壽係金魚中較大嘅品種，分「協會系」同「宇野系」，主要產自日本，呢類比賽喺日本搞咗逾60年，香港就第一次搞。香港蘭壽協會總經理雷昌年話，香港買蘭壽，平嘅200蚊，最靚嘅幾萬蚊都有。八方都趁機學下點分邊條係「東大關」（即冠軍），邊條名落孫山。雷生話，比賽係按體型、顏色、泳姿三大範疇，一共10幾項細節畀分。以泳姿為例，魚游水嗰時，身體擺動幅度唔可以過大，要好似架車轉彎「飄移」咁順暢就為之有美態；顏色亦唔可以一味夠鮮艷，透啲美感就最好。八方聽完覺得自己昇華咗咯。