要講好文采嘅上市公司高層，港交所（388）行政總裁李小加應該數一數二，佢耐唔耐就寫blog講吓港交所做緊乜，臨近聖誕節，佢又寫信畀聖誕老人嘞。
李小加今次第二年寫信畀聖誕老人，其實都係搵個名堂回顧一年做過乜，明年又有乜搞作啫。今年最大件事當然係滬港通開通後，引來港股大時代，不過呢個大升市轉眼唔見咗。
李小加將呢個過程形容為：「先是春天來了一場大牛市，燥熱無比，緊接着夏天來了一場大暴雨，氣溫驟降。」佢話好在香港市場能夠處驚不變。咁又係呀，香港嘅散戶都未被呢場大暴雨浸死晒！
佢話，滬港通呢座大橋安全平穩運作1年，佢哋正為大橋下一步擴容做準備，同時亦已經為新嘅大橋開通做好了準備，應該係講緊深港通喇。佢下月就會公佈未來三年戰略發展規劃，仲叫聖誕老人得閒就去聽喎。其實邊個去聽唔重要，最緊要係李小加講得出，執行到啫。