上周六意甲，作客嘅安玻里以3:2反勝博洛尼亞。安玻里憑佩斯亞利尼喺24分鐘開紀錄，主隊嘅比恩沙喺36分鐘幫球隊扳平。不過馬卡朗尼喺42分鐘再幫客軍入波，而佢嘅慶祝方法都好特別，竟然係衝去觀眾席搶咗球迷杯啤酒飲。雖然迪斯度臨完上半場再幫主隊追平，但唔知馬卡朗尼係咪飲完啤酒特別醒神，佢喺易邊後48分鐘再入多球，幫安玻里鎖定勝局。