投資買賣最好扑中優質潛力股，博長線升值。炒玩具figure亦一樣，識儲，一定儲《星戰》系列玩具模型。
炒《星戰》figure，點都要講吓美國玩具商Kenner。《星戰》系列玩具模型嘅授權最初由Kenner於1977年奪得。當年公司低估了《星戰》系列玩具需求，喺聖誕節無法如期將《星戰》玩具模型出貨。Kenner為免小朋友聖誕節收到個吉盒做禮物，情急下改為《星戰》早鳥優惠，內附一張《星戰》玩具模型證書同迷你佈景板，小朋友填好證書後寄回公司，翌年2月到6月就會收到《星戰》12吋玩具模型系列。結果1978年Kenner賣出4,000萬套《星戰》玩具模型，做咗一億美元生意。Kenner喺《星戰》30周年，《星戰》玩具模型銷售額累積有90億美元。公司最後更被美國玩具龍頭孩之寶收歸旗下。
趁《星戰7》上映再去eBay望望，哪些年《星戰》迷收過嘅玩具模型，今日有機會升值10倍。由Kenner生產嘅《星戰》玩具模型，全套25款人物，競投價最誇張要11萬港元；黑武士12吋figure標價都可以兩萬七千蚊。同時相信有樣嘢令收藏價值升，就係部份Kenner生產嘅《星戰》玩具模型，腳仔上會印咗「Made in Hong Kong」。所以唔好話儲《星戰》figure係儲垃圾，大家都係幫緊保育香港玩具歷史出分力。
C+B
本欄逢周一刊出