食物及衞生局局長高永文喺12月6日出席親子跑步活動時，俾個小朋友絆倒見紅（圖），面部受傷要入院縫針兼放病假。話咁快，兩星期已經過去，民望高今日正式復工，朝早會返政府總部做嘢，相信唔少傳媒都會等佢返工，問候吓佢兼睇吓有無破相。
民望高出名多活動多應酬，呢兩個星期，署理局長陳肇始都頂咗唔少嘢，噚日陳肇始出席活動嘅都被問到局長狀況，佢話局長額頭傷口已經拆線，情況無乜特別，但即使病假，都經常與同事喺工作上有聯絡。食衞局接二連三有人受傷，有行家就建議不如睇吓風水，亦有人笑言局長返工應該檻一檻火盆，咁又係，去一去啲病氣都好吖。