港大副校長風波似乎暫時告一段落，就連風眼校務委員會亦都已經轉莊，渣打銀行大中華及北亞地區行政總裁洪丕正剛完成6年校務委員任期，12月正式退任。華華早前見到洪丕正，問番佢呢半年來有乜感受，佢竟然呻到樹葉落咁話，「成日開會，啲會又長，又俾人圍毆」佢仲因此諗番起雷曼事件㖭呀！
佢講嘅圍毆，當然唔係真打喇，意思係俾人鬧。佢提番起：「早7、8年俾人圍毆雷曼，我兩年幾未行過中環呀！」
事緣2008年金融海嘯，雷曼爆煲，渣打當年有份銷售雷曼ELN（股票掛鈎票據），因此收到上千宗雷曼苦主投訴，事件擾攘2、3年，渣打最終喺2011年跟證監會同金管局達成共識，同意向客戶回購未到期嘅雷曼ELN。當年好多雷曼苦主，洪丕正如果喺中環周圍行，真係隨時俾人追數呀。