仇人見面份外眼紅，勇士憑住「咖喱仔」史堤芬居里（Stephen Curry）發威，喺周五NBA常規賽主場以121:112擊敗公鹿，報番俾公鹿搞到連勝斷纜之仇。
捕「鹿」過程勁牙煙
勇士之前喺作客之旅最後一站輸畀公鹿，班球員梗係唔忿氣，「浪花兄弟」甚至喺賽前已經放出狠話，話今場一定要贏。其實勇士今場都贏得好驚險，去到最後5分20秒先反超前；「咖喱仔」打出「準三雙」，拎到26分10籃板九助攻，加上K湯遜（Klay Thompson）同祖蒙特格連（Draymond Green）分別攞到27同21分，成功復仇。
甲骨文球場被譽為最有主場之利嘅球場，勇士球迷見到公鹿粉絲喺上場整件「24-1」tee咁寸，就諗計反擊；喺賽前整咗件「10-18」tee，想笑公鹿戰績差，今場輸埋就輸足18場。點知勇士一直落後，搞到大部份球迷就鬼鬼祟祟咁搵外套遮住件tee，去到贏波先敢露出嚟，真係又要威又要帶頭盔。件衫出現得嗰幾分鐘，公鹿教練傑特（Jason Kidd）事後都忍唔住寸佢哋，整呢件衫簡直係嘥錢嘥時間。
