今日台北馬拉松，參賽人數唔夠三萬，但已經係台灣最多人參加嘅長跑活動，不過大會話明年打算取消10公里項目，預備發展成為一個純馬拉松項目，重質不重量，當然引來唔少反應，但我淨係知道台灣其實年中比賽多得很，各適其適玩乜都得，連健康嘅三點式泳衣跑都有。佢哋跑步風氣嘅盛行，從台灣最靚嘅風景講起就啱，即是可愛嘅台灣人呀。
喺台灣長跑界，有好多代表人物，個個都好有特色！例如佢哋上屆倫敦奧運馬拉松代表張嘉哲，呢位鍾意留鬚嘅四眼仔非常愛打扮，平日嘅運動相，唔sharp嘅色唔carry，可以話係chok住跑嘅代表人物。張嘉哲喺網上嘅外號就叫做真男人，佢人生座右銘冇講出嚟但我估到：唔型，不如唔好跑！
男士們請放心，台灣跑步人口根據現場目測，妹妹係多過仔仔嘅，台妹們可以話係運動場上嘅清泉，佢哋未必跑得靚，但一定着得好靚，佢哋跑步嘅目的，彷彿唔係想自己快，而係想刺激你快，睇見佢哋，原本唔想跑嘅你會仆到去跑；跑到冇氣嘅你會突然順番條氣！呢種雌激素大補劑唔知點解香港地無乜出產，咁多年好似來來去去得個劉心悠，而佢當然亦係台灣出品！
若果嫌心悠BB睇到悶，可以試下新一代跑步女神歐陽靖，嗱唔係唱rap嗰位男士，而係一位好yeah嘅model，不過自從佢成日飛來飛去跑馬拉松之後，靖哥已經變成一個職業跑手咁款，馬拉松先係佢嘅舞台！佢跑得唔快，最近嘅夏威夷馬拉松用咗五個幾鐘完成，但佢每次都跑得晒，靖哥嘅賣點就係夠恒心，同埋夠貼心 ，賽前佢會教你化咩妝唔會溶，賽後就會分享吓點樣浸浴最relax，女仔覺得佢man，男仔鍾意佢靚，來一個殺一個。
KEYMAN
節目主持