「全球足球冠軍之旅」喺上周五揭開序幕，由「萬人迷」碧咸（右）領軍嘅國際明星隊，無視國際足協嘅禁令，喺科威特舉行首站賽事。雖然國際明星隊最終以2:4不敵科威特明星隊，但相信入場球迷見到成班退役球星，都已經覺得值回票價。
無視禁令赴科威特出賽
科威特正受到國際足協（FIFA）嘅禁賽令限制，但賽事都如期舉行，雖然謝拉特同派路等球員喺得悉FIFA嘅警告後退出賽事，但係大部份退役球星都懶理禁令，如常參賽。如果入場球迷係皇馬球迷就一定勁開心，因為曾經係「銀河艦隊」一分子嘅碧咸、費高、卡路士同沙加度都有落場比賽，而咸爺開賽15分鐘就交出助攻，畀費高勁射破網。相信球迷見到呢幕，應該開心過收到聖誕禮物。
雖然國際明星隊嘅陣容星光熠熠，但係成班退役老將嘅體能真係差到不得了；領先咗五分鐘就畀對手追平，科威特明星隊仲拉開比數至3:1。不過40歲嘅咸爺真係寶刀未老，佢雖然冇波入，但係最後都助攻畀皮利斯建功，令國際明星隊追至2:4完場。