這天沙田跑馬，華將先後有黎海榮「大將風馳」同黃皓楠「創出商機」爆大冷，分勝第二、三場，攜手包辦一口萬七蚊巨型孖寶；那邊廂，雷神卻致力做大熱保衛者，繼頭場勝出1.9倍鄭廐「四小福」後，佢於第四場四班田草1600米，以3.3倍賀廐「團圓飛舞」一條直路連追八、九駒再下一城，個人自製一口大熱孖寶，火速於騎師王領前。「團圓飛舞」組合獨贏屬A1選項，並派17元。
賀賢馬房之「團圓飛舞」堪稱近年最神奇低班王，由今年五月底轉倉後第二仗勝出開始，連同這天直落跨季六連勝冇斷纜，並由最初跌到18分護級漩渦，反彈到這天賽前的57分，贏埋今場最近將評60分以上，八歲老黃忠成功將馬壇神話延續落去。
賽後雷神好興奮，返來覆磅途中，在草地跑道將馬鞭拋給看台對出空地的賀賢，後者一手接住並舉鞭歡呼，開心程度像贏大賽似的。
呢場投注四重彩，搵雷神做膽拖番幾位華將就有錢收，事關依次跑二至四名的「勝算高」、「駕善」及「運財之星」，鞍上人分別為楊明綸、黃皓楠及湯智傑，四重彩11,480元。當中皓楠仔跑完前四場拎咗冠季殿各一，係這天暫時最醒神華將。