「聽說佳佳被業主加租逼遷！」「係咪講緊佢老公？」「唔係呀，佐敦間佳佳甜品呀！」
三位OL相約午飯，談論的話題離不開工作、旅行、購物、飲食、老公、仔女同埋白癡事物。
「如果我係嗰間佳佳甜品，我真係寧願米芝蓮唔好嚟食我（甜品）、影我（甜品）喇！」「係啦！我都係咁話！人怕出名豬怕肥嘛！業主見到間舖咁出名，唔加租就笨啦，有得賺點解唔賺？換轉係你都會加租啦，係咪咁話？」「冇錯喇！」
她們在同一間大企業工作，平時既忙於跑數人事也複雜，公司業績受自由行減少而出現倒退，每天都要擔心自己會否成為下一個裁員對象；她們經常埋怨好人冇得留低，但「殺人放火」的卻可以步步高陞，經常過着「有開工冇收工」的日子，工作壓力相當大，得閒死唔得閒病，有時間也寧願多休息。面對名牌手袋店大特賣、著名朱古力品牌雪糕球買一送一等折扣着數相當敏感，但對於高樓價高租金，只會認命兼秉承「民不與官、商鬥」的崇高原則。
「換轉係我就寧願儲定錢買番間舖喇！一直經營又得，劏半間舖租畀人賺吓外快亦得！同業主鬥點會成功呢？」「我覺得佳佳可以轉型做高檔甜品舖，引入宮廷式設計，店員着宮廷服裝，糖水賣一百蚊一碗，附送星級服務，有公主級享受，搬埋入酒店做，來個華麗轉身，分分鐘蜚聲國際呢！」「Good idea！佳佳唔請你做業務顧問真係損失！」
語畢，她們飛快離座，準備繼續「搏殺」。
地產小子
http://propertykids.blogspot.hk/