時光飛逝，4點鐘許Sir許鎮德不經不覺做咗警察公共關係科（PPRB）一哥近兩年，早排警隊公佈新一輪人事調動，許Sir下月7日調去深水埗警區出任指揮官，而接許Sir棒嘅係O記阿頭區展秋。
噚日新舊PPRB一哥交接，PPRB搞搞新意思，許Sir同區Sir着圍裙親自沖奶茶畀傳媒飲，為警隊facebook賣廣告，預告將有新環節出現，就係有兩名新卡通人物—警員恆仔同喺警察總部食堂負責沖奶茶嘅港仔，但PPRB唔肯講新環節內容，淨係叫八方留意fb。
至於呢位區Sir有幾猛料？原來除咗水警總區外，佢做勻晒其他總區，破過唔少大案，區Sir同八方講番唔少難忘案件，好似劉進圖案，佢同成班手足不眠不休追查，佢連屋企都冇乜點返，經過三星期終於破案拉咗行兇者，佢話警方仲追查緊幕後黑手。
難忘無味神探硬漢子
另一件難忘事係破141.com案，行動嗰日出動飛虎隊由窗口突擊，當日搜出幾百萬現金證物，區Sir話啲錢塞爆佢寫字樓嘅夾萬。
區Sir港大畢業後考督察，等消息期間做過中學兼職數學教師。同佢同期喺學堂受訓嘅有已故無味神探陳思祺，區Sir話到呢刻仲記得當年陳Sir受槍擊情景，仲讚陳Sir係名副其實硬漢子，重情義。
李八方
mailto:[email protected]