2012年特首選舉，除咗「你呃人」呢幕，經典場面仲有候選人唐英年被揭九龍塘約道寓所有僭建。最近唐宮已完成翻新，唐唐當初搵瑞士回流返港嘅年輕建築師陳維正（Billy）同施琪珊（Ida）幫手，二人亦因此決定留港發展，噚日二人嘅公司IDA & BILLY ARCHITECTS開張，唐唐同太太都有到賀（圖）。
原來Billy同Ida係唐唐以前嘅御用建築師馮永基介紹，唐唐話好滿意佢哋設計，而最滿意係連接兩間大屋嘅玻璃橋，笑言自己間屋因僭建事件而成為「全香港最出名嘅屋仔」。Billy話好難得唐唐畀呢個機會年輕人，佢都話條玻璃橋最花心血，仲透露工作室有部份係用唐宮剩餘裝修物料改造成，包括大門嘅木材，果然環保。唐唐出名愛酒，唔知酒窖設計有冇特別要求呢？唐太笑言唔使點設計，「因為酒一拎出嚟就會飲清晒」。