公民黨毛孟靜前晚喺立法會開完會後，去咗立法會外反「網絡23條」集會，相比民主黨劉慧卿、黃碧雲，Miss Mo就冇咁好彩，一個唔小心跣親，搞到扭傷腰，噚日仲要撐枴杖返立法會㖭（圖）。
前晚出事後，好多人以為Miss Mo曾一度暈咗，噚日佢同八方講，當時確係眼前一黑、跣一跣腳，但係絕對冇暈，不過呢一跣就觸發佢腰部舊患，所以行路嗰陣，由腰到後尾枕都有啲赤赤地，而坐低或揸車就冇問題。Miss Mo亦大讚黨友郭榮鏗好sweet，事關前晚郭榮鏗一知佢出事就大為緊張，即刻話要接佢返屋企兼隨傳隨到。郭榮鏗咁體貼，難怪Miss Mo大讚嘅。