臨近年尾，英超仲係打得如火如荼，但係好多球隊每年到咗聖誕，都會抽時間做慈善活動。利物浦領隊高路普就喺周四帶埋球員，去到兒童醫院探吓啲小朋友，就連養緊傷嘅史杜列治都有出席。成班紅軍除咗送禮物畀小朋友之外，仲玩自拍，氹到佢哋勁開心。另一邊廂，熱刺嘅球員都去咗醫院，為病人帶嚟歡樂。