全城期待下周一開幕、以全球首次公開試玩「陀飛輪」作招徠嘅東華慈善嘉年華，臨門脫腳，初步延至下周三先開放。據了解，延期係因為機動遊戲未獲機電工程署發牌。八方問主辦單位，下周三有冇得玩「陀飛輪」？可惜大會公關三緘其口，話管理層冇嘢好講。機電署就坦白好多，指截至昨日，冇一部機動遊戲獲批出「使用及操作許可證」。
機電署話，迄今收到主辦單位18部機動遊戲申請「設計批准」，其中10部已批，當中6部組裝同測試中；噚日有兩部申請使用及操作許可證，正在審批。該署表示，據主辦單位提供嘅資料，部份機動遊戲下周三啟用，其他要月底至明年1月啟用，詳情就要問大會。但係大會乜都唔講，咁買唔買飛入場玩好先？