近日《星球大戰》熱潮重臨，劇中經典角色包括Luke Skywalker天行者，而馬場原來亦有個小天行者，就係練馬師霍利時的14歲兒子阿Luke，佢嘅志向亦好大，希望滿15歲就入香港見習騎師學校，將來成為一代高手。
呢日快活谷舉行試閘，霍利時留守沙田，妻女及阿Luke就去快活谷幫手為試閘馬匹打點一切，試到最後第八組時，阿Luke唔知係咪恨騎馬恨到發燒，趁時廐「樂趣」仲準備緊之際，阿Luke向騎師郭能取去「樂趣」的綵衣及馬鞭，穿喺自己身上，又戴上騎師帽，喺度揮動佢嘅暗啞激光劍即係馬鞭，自娛一番，家姐見到都冇佢咁好氣。睇嚟阿Luke真係好恨策馬奔馳。不過佢始終未合資格，最後都要交番畀郭能，自己無奈做番觀眾。
至於「樂趣」，馬主黃頌顯有到場監督，不過隻馬喺呢組1000米草閘走勢平常，沿途居中跟跑，衝刺一般只得第五。隻馬過去19戰只得一席第二，一對膝部又做過手術，已缺陣多時，睇嚟要真正嘅Skywalker出現，先至打救到佢！