想享受由旅發局提供、價值逾38萬嘅4日3夜香港之旅，坐商務位、住總統套房，仲餐餐食米芝蓮，再送埋錢瘋狂掃貨，這些機會……不屬於八方的。
咁大隻蛤乸其實係由香港旅遊業界贊助，業界月前搞咗個「百萬富翁香港遊」抽獎活動，來自台灣花蓮嘅林維毅係十個得獎者之一。佢同太太本周一坐國泰商務位來港，一落地就有專人接去W酒店住總統套房，據講要成4萬蚊一晚。
住得舒適，食當然要招積，7間米芝蓮餐廳輪流去，又添好運，又甘牌燒鵝，又國福樓，連食廚魔Bo Innovation都食足三粒鐘，仲有5萬蚊信用卡簽賬額同一萬蚊免稅店禮品卡任使（圖）。又食又拎，梗係要有付出，除咗要接受記者訪問，仲要趕唔同景點幫香港影相做宣傳，返台後亦要盡義務推廣香港。