世間上有啲巧合真係冇辦法解釋到，過去兩次夜戰都出現平頭馬，先有騎師賽「千真萬確」同「開心健康」做雙冠軍，繼而本星期三有「火麒麟」同「哥哥仔」平頭季軍。心水清嘅馬迷，就會發現都係姚本輝同賀賢嘅馬不分勝負，兩位練馬師居然做咗歡喜冤家，佢哋周六（19日）第四場四班1600米，同樣有實力馬列陣，唔知會唔會又不分勝負呢？
呢場賀廄8歲老馬「團圓飛舞」5月底開始，喺莫雷拉胯下連勝5場，做咗香港馬圈難得一見嘅「耆英神獸」，但上仗只以頸位之微建功，姿態有少少辛苦，當日賽後賀賢就說：「每匹馬總會遇到盡頭，冇乜可能無止境咁上。」
不過「團圓飛舞」小休個多月後，本月初由雷神試閘，臨尾追勢都幾勁，似乎體力恢復得八八九九，雷神亦話隻馬保養得好好，今次有新鮮感之下，縮程跑1600米更具威力，雷神認為唔係冇機會跨季六連捷。
至於同場姚廐匹「實在威」，上仗1400米配貝諾華，排大外檔大半程包尾，以為必大敗之際，竟然狂追衝入殿軍，季軍「精算博奕」同第5名「開心健康」再出都贏，反映賽事水準高。拼後貝諾華非常肉緊不時親操，本月初更安排試大閘，備戰有誠意，而嗰課閘隻馬亦輕鬆勝出，成熟狀態有進冇退。睇怕呢場賀賢、姚本輝又會鬥餐飽咯！