第二屆亞洲玩具展噚日喺九展開鑼，適逢電影《星球大戰︰原力覺醒》上映，焦點當然離唔開白兵同黑武士，幾乎個個展商都唔執輸入番一兩隻星戰公仔賣吓，最矚目當然係全球限量450套、每日限售150套嘅白兵figure（圖）。八方問過排頭位嘅市民，佢話呢啲模型轉個手分分鐘賺二、三千蚊。
不過八方發現好多買家都唔係fans，例如喺順德落嚟排咗成晚通宵嘅馮生就同八方講，自己其實麻麻哋鍾意星戰，但都使咗成萬銀買特別版遊戲機，以及限量白兵figure。佢本來話買嚟自己儲，不過八方向佢提起「市價」後，馮生即刻轉口風：「嘩你唔好透露啲咁嘅消息畀我知喎，我真係會攞去賣！」玩具模型Hot Toys負責人李雪兒指，大多數人熱捧英雄電影嘅正派角色，但《星戰》反而係歹角白兵最多人買，「買多幾隻一齊擺夠晒氣勢」。