過去15年在無綫默默耕耘的陳國邦，有感多年無發展機會，今年10月在微博向無綫發公開信宣佈離巢。
然而，事隔僅兩個多月，阿邦極速回歸，接拍無綫明年3月由毛舜筠和黎耀祥孭飛的新處境劇。阿邦昨在電話中說：「我係口頭上應承咗，其實主要係毛姐（毛舜筠）親自搵我，打動我係毛姐、珍姐（曾勵珍）。」阿邦指毛舜筠聯絡後無綫亦積極找他斟洽，他謂：「我講過邊度需要我，我就去邊度，只係估唔到公司咁快行動，需要我返去，我就應承咗。」
「佢哋需要我」
阿邦的公開信曾獲網民讚賞支持，現他極速回巢，難免令人覺得這場角力無綫贏了一仗。對此阿邦說：「如果兩方面都係鬥緊氣嘅話，係可以用咁樣模式去理解，但我唔係同無綫鬥氣。我喺無綫唔係冇工作，只不過喺工作上得唔到我預期同要求，所以我選擇離開，唔係話兩方面鬥緊氣、最後邊一個屈服。如果用呢個思維嘅話，其實無綫仲難下呢個決定。我喺封信裏面都講過，我離開無綫，跟住去邊，自己都唔知。𠵱家無綫需要我，無論毛姐、珍姐或者杜之克（助理總經理）先生都好，咁大嘅誠意、用咗好多時間，傾咗好多次，既然佢哋需要我，咁我咪返去囉。」
阿邦續說：「我唔怕啲人話我食回頭草、輸咗，個過程話到畀我知，我（無綫）仲需要你，所以我覺得OK，兩邊都贏。」據悉阿邦回歸擔正男二，對此他說：「我聽過個古仔，斷唔會係行行企企，戲份唔輕。男一係祥仔（黎耀祥），但究竟我係男二男三或者其他，我就冇仔細去用數字問清楚。」
此外，無綫小生花旦買少見少，惟有密斟離巢藝人回歸，包括力邀之前鬧爆無綫的鄧萃雯開拍新劇。另有報道指佘詩曼因獅子開大口而被無綫飛出《使徒行者2》，但至截稿未獲二人回覆。
採訪：魯吉
