話咁快又到年尾，距離出年2月尾嘅立法會新界東補選越嚟越近。磨拳擦掌落場嘅公民黨楊岳橋，獲泛民力撐；另一邊廂，青年新政今日就再同公民黨開會傾初選問題，相信呢一、兩日成件事會明朗化。
泛民會議召集人何秀蘭話，最終公民黨係咪派楊岳橋參與新東補選，當然由番公民黨自己決定，不過楊岳橋噚日已拜會過泛民會議，泛民亦同意撐楊岳橋。另一邊廂，青政召集人梁頌恒（圖）就話，青政當然有興趣參選啦，但都要睇公民黨嗰邊點。今日雙方會再傾搞唔搞初選，搞嘅話青政就會喺72小時內決定應戰人選，唔搞嘅話就行緊急機制，48小時內決定仲派唔派人參選。