為咗「網絡23條」，成個立法會啲質詢又陷於大塞車。原定本周三嘅大會做9條口頭質詢，清埋上星期因流會而做唔到嗰3條，不過建制派不滿拉布，突然反對一次過做9條，搞到尾嗰3條延至出年先做到。
噚日內會傾明年1月6號嘅大會安排，內會主席梁君彥話到時照舊做6條口頭質詢。泛民梗係唔制，否則咪好快又審番網絡23條！呢次梁君彥學精咗，唔再做醜人幫手提出做9條。於是人民力量陳志全、新同盟范國威就問，係咪議員自己都可以預告後提動議，要求做9條。當然得啦，不過民建聯葉國謙講明反對做9條，但相信泛民到時會照提動議，大會主席曾鈺成所講「催魂鐘」又再嚟過。