《蘋果日報》早前揭發葵青大白田選區，民建聯候選人郭芙蓉涉嫌種票事件，民主黨總幹事林卓廷昨日接受《壹錘定音》訪問時表示已經就事件向廉署和選舉事務處報案，但能否成功檢控仍是未知之數。他認為選舉事務處應該更積極抽查選民的資格，防患於未然。
林卓廷批評選舉事務處將覆核選民資格的責任推卸給政黨，「我哋邊有咁多資源、人手，更重要嘅係我哋無執法嘅能力，去查核嫌疑犯。如果我哋敲幾次門，佢哋都唔開門，咁我哋檢唔檢舉佢好呢？」而且在檢舉的同時，可能會成為對手攻擊的理由，「如果我哋投訴晒所有懷疑個案，可能就會殺錯良民，咁嗰啲良民又會投訴我哋喎，話我哋濫用個機制……但當你將個標準定到好高嘅話呢，就會出現好多漏網之魚」。
種票手法比以往高明
公民黨成員楊岳橋在同一節目指要在今屆區選中，抽出種票選民的難度比以往高，「佢哋今屆聰明咗，唔會再有一屋七姓十三人，但佢可能會攞住個名單，睇到呢家人得兩個人，咁就放多兩個落去，咁其實你唔會覺，因為係私樓，你會諗係上一手㗎嘛，如果係租樓嘅話，就更加唔覺」。楊認為即時可以成功檢控種票的選民，亦難以找出幕後的黑手，所以選民登記制度必須優化。
過往曾處理過不少貪污案件的林卓廷指種票的案件中多會涉及中間人，「通常都會由佢哋去處理選民登記，候選人唔會落手落腳去做咁笨㗎，咁你話最終嘅幕後黑手點樣抽出嚟，係相當唔容易」。
抽查責任在於政府，鑑於登記制度備受批評，所以政府早前發表《優化選民登記制度諮詢文件》，但當中的舉報制度要求檢舉人自己舉證，林卓廷認為十分荒謬，「一個香港市民點樣舉證？從來喺香港制度，你要舉報任何犯罪行為，提供一個合理嘅資料畀執法部門，由佢去調查㗎嘛！即係要報警，要你證明嗰個係賊，你點證明丫？」
兩人不約而同認為要加強抽查的力度，例如檢查選民名冊，若發現一家多姓的情況，必須發信要求有關居民重新確認。楊岳橋認為在下一個選民登記截止前，若果選民要改地址就必須遞交相關的證明。林卓廷就指應該加重罰則，「𠵱家虛報地扯，而唔投票嘅罰則只係幾千蚊，冇監禁刑罰，阻嚇力完全唔夠」。
市民需提高關注度
林卓廷亦希望市民若發現疑似個案，向政黨投訴，不要習以為常。楊岳橋亦指觀察到社會對種票的議題不算太關注，「4年前，我哋講『一屋七姓十三票』，個個都覺得有冇搞錯，上咗幾日頭版，但今次種票變成一種『風土病』，噢，你又感冒，所以市民唔應該唔當佢係一回事」。
慧玲則認為種票性質嚴重，政府責無旁貸，必須在選舉前加強抽查選民資格，以防選舉不公。她批評傳媒揭露了居於甲選區公屋的人突然改地址在乙選區投票，種票證據確鑿，但竟然不見政府有任何反應跟進，令人難以接受。
■記者黎千銘
星期一至五黃昏6時直播
《壹錘定音》收睇/收聽方法
1:手機App
《蘋果動新聞》手機App右上角有【壹錘定音】icon，一按即聽；按左上角icon，彈出【壹錘定音】選項，一按即睇。
2:網頁： http://www.hammerout.hk/
直播PHONE IN：2992 3333
WhatsApp 留言/報料：9132 3813