今年浪琴表香港國際大賽吸引超過八萬人入沙田馬場，投注額高達14億4千9百幾萬，馬會主辦賽事確係成功嘅，可喜可賀。左丁山觀賽多年，知道國際大賽會係全年最旺場之日，一定塞車，故此十一點幾已入咗場，坐定定先。沙圈內有四川雜技表演，兩位漢子人叠人之後，一人單手支撐落十幾級木梯，跟住上番樓梯，啲平衡力、腰力、彈力與臂力之強，着實不可思議，難怪全場觀賞馬迷拍爛手掌。跟住到楊千嬅出場，以為係表演高潮所在，點知唔係。左丁山一輩，聽慣鄧麗君、梅艷芳、張惠妹、徐小鳳、甄妮等等，呢日第一次現場睇楊千嬅，只覺聲音低沉，令人昏昏欲睡，兼夾佢唱慢歌，哀愁歌，與國際大賽之現場歡樂熱鬧氣氛等等唔配合，唔怪得廂房內馬迷話：「刨馬好過！」廂房內有不少電視，一個近距離大特寫鏡頭就顯露出楊小姐眼神疲憊，似乎睡眠不足，表演大忌也。
好彩馬迷冇乜留意呢啲嘢嘅，明年馬會或者贊助商搵表演歌星表演，唔該指定要唱熱鬧興奮嘅勁歌，配合現場活力充沛之象，冇理由在此場合唱吓好似「情已逝，淚將流」呢類失戀情歌嘅啫。是日馬場內聽講還有一粒大明星，叫做Simon Baker，左丁山唔知佢係邊位，問幾位男士馬迷（年紀五十以上嘅嘞，馬場內似肥仔K呢啲80後馬迷，比較少見），佢地亦唔清楚，反而有幾位鄰座女士就識喎：「電視片集紅星呀！」後來肥仔K來到，再問，佢唔客氣咁話：「你地老嘞，邊識啲潮流嘢吖，Simon Baker係澳洲人，多拍美國電視片集，近年都幾紅㗎！」唔怪得之，今年就見呢位Simon Baker在馬場出現，佢嘅知名度高唔高，要睇係問乜嘢人，起碼在上星期五浪琴表Gala Dinner之夜，在會展大排筵席請客，有90席以上，就唔見到有幾多人去搵Simon Baker影相。呢，幾年前，已故大明星奧馬沙利夫，有隻馬參加國際賽，奧馬沙利夫以馬主身份來港，在洲際酒店宴會上，就有不少賓客主動要求與奧馬沙利夫合照，包括左丁山在內。浪琴表贊助賽馬都幾捨得花錢，一切務求盡善盡美，加上馬會效率素來世界馳名，單係睇當日招待世界傳媒自助午餐，紅白酒任飲，生蠔龍蝦任食，外國記者無不讚好。左丁山去過新加坡新航大賽與東京安田紀念大賽，呢度外賓啲食物無論數量與味道，只係有限公司咋！