現年25歲的「巨聲幫」吳業坤入行五年，最近憑「毒男」形象人氣暴升，前晚在九展舉行「新城勁爆躍進．創作搶先獎」，坤哥輕易奪得「男新人王」，事業得志的他，被傳拍劇集《愛．回家》力追扮演家姐的26歲龔嘉欣，坤哥否認：「事業暫時順利，不過愛情暫時冇乜着落，我都當佢係現實中嘅家姐，因為佢拍劇經歷比我多，亦都好照顧我，教我企位同拍劇技巧，我有時都會喺公司請佢食飯當交學費。」
坤哥否認追求嘉欣，但承認留意對方演技，問會否接受姊弟戀？坤哥說：「點講呢！世界乜都有可能，母女戀都得！」記者笑是否想變性？他說：「唔係，只係有好多可能性，唔會講冇可能，每到一個年紀都會有新感覺，可能自己聽日會接受到，不過呢刻就唔諗。」至於被封「毒男」，坤哥無奈說：「點解大家會覺得我比較『毒』，係因為副黑色框眼鏡太『毒』，自己都好welcome大家嘅意見。」
此外，龔嘉欣昨到深水埗出席活動，否認被坤哥追求：「佢人紅是非多，我同佢合作拍劇難免有新聞，我要花多啲時間觀察，要睇清楚係咪適合自己，我鍾意專一同成熟男仔。」問跟鄧健泓的舊情是否有陰影？她坦言：「都係㗎，見過鬼唔怕黑咩，所以需要時間了解，見過鬼，唔想再見鬼。」
採訪：馬建華
攝影：陳俊強