距2017年特首選舉，時間越嚟越短，到底除咗梁振英，阿爺仲有乜心水人選？八方當然唔知啦，呢啲國家機密，知咗仲大鑊。但無論阿爺最終想欽點邊位，退休多時嘅前教育局局長孫明揚，都有心目中最佳人選，仲聲言唔排除日後為對方助選㖭，可惜佢大賣關子，唔向外公佈屬意人選。
話說孫公接受港台訪問時，談及下任特首所需條件，佢話喎，最重要係做到政通人和，即係既要代表香港爭取利益，亦不能忽略香港係中國一部份，總之「一國」同「兩制」必須兼顧，當然啦，民望都係特首關鍵條件。
單睇呢幾點，梁振英似乎唔係孫公之選，但孫公唔肯講心水之選係邊位。咁會唔會支持梁振英連任呢？佢話𠵱家唔係表態時候，一切盡在不言中。