周三作客快艇賽前，打斷勇士NBA開季連勝紀錄嘅公鹿四子包括後衞米度頓（Khris Middleton）、中鋒蒙路（Greg Monroe）等就被踢爆周一晚夜蒲洛杉磯脫衣舞俱樂部，搞到繼周二不敵湖人後，再以90:103不敵快艇，錄得洛城兩連敗，教練傑特就話要商量吓點處分。
皮雅斯得分達里程碑
快艇周三主場對公鹿呢場波都幾一面倒，快艇第一節中段領先後就帶到尾，淨勝13分，前鋒皮雅斯（Paul Pierce）就拎到6分，NBA累積射入超過26,000分，續排得分榜16位。
公鹿之前打破勇士連勝走勢，但去到洛杉磯竟然連輸兩場，事出必有因；美國狗仔網站《TMZ》爆料，話公鹿四名球員米度頓、蒙路、OJ美奧（O.J. Mayo）、布林利（Miles Plumlee）周一晚夜蒲當地脫衣舞俱樂部，仲玩到興起不時灑錢入舞池，唔怪得連續兩場都腳仔軟。傑特就好嬲咁講：「年輕球隊要學習專業，就算出街食晚餐都要負責，我哋將會商量，點樣可以畀足夠嘅處分佢哋。」
至於意外被公鹿終止連勝嘅勇士，周三返回主場就回勇，以128:103大勝太陽，周五主場對公鹿，史堤芬居里（Stephen Curry）就話會「熱情歡迎」公鹿球員，唔大炒一場報仇就勢係假。（now635台周六11:30am直播）
