就算政見南轅北轍，唔等於唔可以輕鬆講笑！民主黨主席劉慧卿前晚喺立法會散會後，走到會外嘅示威區會見反「網絡23條」集會人士，諗住講解下白鴿黨立場，點知被圍兼被噓（圖）。建制派議員原來對呢件事高度關注，民建聯葉國謙昨早喺立法會宴會廳食早餐時，主動同劉慧卿交談兼就此「互窒」。
阿謙話喎，佢席間特登就此事問卿姐：「你噚（前）日去到集會俾人噓呀？」卿姐當然不甘示弱，即刻反駁話：「你哋都俾人噓啦！」阿謙話自己即刻回應：「我冇去嗰啲咁嘅地方喎！」仲笑指，對方前日要經保安開路返回立法會：「佢（卿姐）都知道保安對佢嘅重要性啦！」八方相信若然去集會嘅係建制派，真係多多保安都唔夠咯。