古董鑑定有新進展！浸會大學物理系研究出全球獨有高靈敏度激光技術，用嚟鑑定古董及油畫真偽。浸大物理系教授張迺豪話呀，新技術已取得美國專利，並同法國羅浮宮確定合作計劃，下月商議開展合作程序，本港博物館亦有意同研究團隊洽談合作計劃，分析具爭議嘅古董同文件。
浸大新創嘅激光鑑定技術犀利之處，係較傳統嘅激光顯微探針技術靈敏度高100至1,000倍，毋須從古董抽取測試樣本，便可鑑定真偽。除古董同珠寶鑑定，甚至可以應用喺法庭文件同遺囑分析。
張迺豪解釋，新技術係透過激光產生氣團，誘發測試樣本上嘅物質發出螢光，從螢光訊號得出化學元素成分，從而得知真偽，同傳統技術要獲樣本表面物質、會對樣本造成不可修復嘅破損好唔同。