醫院管理局噚日再公佈人事調動，現任醫管局總辦事處聯網服務部總行政經理（聯網運作）鍾健禮醫生（圖）聖誕前獲好消息，下月4日會代替文志賢，接任北區醫院行政總監。鍾健禮可以話係醫管局明日之星，佢係急症室醫生出身，由高級醫生升到顧問醫生，之後再升做青山醫院行政總監，再被調到總部。
醫管局盛讚佢成功改良公院病床監察系統，確保病床能運用得宜，並統籌應對冬季流感高𥧌期應變計劃；而做青山醫院及小欖醫院行政總監時，獲資深臨床領導團隊信任。
1989年港大畢業嘅鍾健禮做署理新界西聯網總監時，一名13歲男童做頸椎手術後不幸死亡，家屬斥醫院將兒子當做白老鼠，之後鍾健禮代表醫院向家屬道歉。