中遠與中海系最近宣佈大重組，中遠系入面，中國遠洋（1919）與中遠太平洋（1199）都有資產變動，剩低中遠國際（517）就停牌一輪話今次重組唔關佢事，公司繼續集中做船舶服務，又係要做強做大云云，內地企業嘅高層最鍾意就係乜都要做強做大。
既然唔使重組，生意都係咁做，有高層就可以退休走去嘆世界了。中遠國際噚日宣佈，61歲嘅何家樂因退休關係，即日起辭去執行董事職務。
老實講，𠵱家醫學昌明，活到80、90歲都係等閒事，活到花甲之齡就搵夠銀退休，真係幸福無比。接替何家樂做執行董事嘅呢位仁兄，係中遠母公司嘅董事丰金華，有趣嘅係，丰金華今年已經59歲，年輕過何家樂少少咋，會唔會過兩年又退休去呢？咁到時咪又要換人？