立法會「網絡23條」嘅拉布戰進入第二日，噚日朝早係流會高峯期，議員都一早到達議事廳全神戒備，結果大步檻過，但要坐定定等住響鐘點人數就避無可避，而喺其中一次等緊齊腳再開會之時，民建聯四男子包括黨團召集人葉國謙、副主席陳克勤、「網絡23條」法案委員會主席陳鑑林以及漁農界何俊賢，就神色凝重咁圍埋（圖），仲齊齊攞出手機左睇右睇，唔通佢哋有大事要辦，所以要對鐘度時間？又莫非，有人收到好正嘅短片，急不及待share一下？
八方問過陳克勤，為乜四條佬圍埋睇手機？佢話葉國謙問緊WhatsApp嘅function，趁點人數有時間咪交流吓囉。