縱橫香港影視圈四十多年的李司棋，去年毅然離開無綫，回顧這一年的自由人生活，司棋姐坦言：「我都冇諗過會離開，我真係好攰，希望有多啲時間休息，想活多幾年，人生有好多嘢，點解淨係對住個錢奔跑呢？」
撰文：何慧斯
李司棋無約一身輕，雖曾經有傳她身體狀況麻麻，更被人影到出入肝腸胃專科診所，但只是一個誤會，事實上她這一年，一方面為有線主持健康飲食節目，另一方面展開她的煲劇生活。
司棋姐早前在尖沙嘴接受訪問時，笑說：「呢一年做咗啲平時想做又做唔到嘅嘢，我睇咗好多美劇、英劇，我覺得真係好好睇，點解人哋有啲咁好嘅橋，可以有咁成功嘅電視劇，我哋缺乏好嘅劇本，一啲真係攞到你個心嘅劇，拍劇除咗做之外，仲要感到言之有物，我唔想彈任何劇本，但係好多時有啲劇，初初睇到都想去追，但係你睇完之後，發覺兜幾個圈原來都冇嘢講。」
嘆缺乏好劇本
司棋姐續說：「我當然希望快啲有改進，我覺得要一段時間，之前我睇緊一套大製作嘅電視劇，我發現有啲劇情，以前喺其他電視同電影出現過，最後我發現始終都係個腦，我哋冇用多啲錢去買個腦，呢個真係好緊要，我哋就係要個劇本嘅精神靈魂，要人個腦諗出嚟，香港第一係缺乏，第二係冇乜人捨得去畀錢，佢哋寧願將啲錢去搵大卡士，覺得可以抬起成套劇，呢啲嘢有用，但問題係如果劇本都寫得好，成件事會更加好。」
當日司棋姐離開無綫，不少人佩服她選擇在65歲有這個轉變，她笑說：「我都冇諗過會離開，臨走嘅前一、兩年，我仲好嚴謹去睇自己嘅將來，我嘅精神狀態真係好攰，呢方面我真係唔夠人哋咁叻，有啲人可以捱到天光都唔會覺得攰，但係我自己真係唔得。如果我用呢個精神狀態去拍劇，始終都會有一日越拍越差，所以不如唔好做，因為我真係用咗好多心血，同埋真感情，如果我將來再做，而我覺得好辛苦又交唔到最好，寧願唔要。」她還說：「我希望有多啲時間休息，想活多幾年，所以覺得係時候要咁樣做，一生人冇壞習慣，加上又冇乜負擔，人生有好多嘢，點解淨係對住個錢奔跑呢？」
場地提供：Teppanyaki Kaika（The ONE）
冇老公唔一定慘
在訪問中途，司棋姐突然有感而發地說：「好多謝冇問婚姻問題，其實好多人喺感情生活方面都有波折，但係每次做訪問，都會問番我離婚嘅事，我諗如果以後有人再問我，我會講清楚話唔好再提，因為實在太悶喇，悶到係人都知，每次話我婚姻失敗，又話我好悲慘，唔係冇老公一定好悲慘。」她續說：「感情上傷害，我覺得已經係上一世嘅事，需要撇脫咗佢，好好繼續新嘅生活，唯一瓜葛係我個女，佢真係好好，好分得清點做人，仲瀟灑過我。」
