聖誕節就到啦，又係交換禮物同抽獎嘅時候，唔知你哋又收過咩禮物呢？係咪全部都鍾意先？
我哋動新聞今次走到旺角街頭，訪問時下年青人到底收過咩禮物覺得最唔對路、收完之後最無奈，而呢啲禮物嘅budget又係幾多錢。
$30budget抽獎禮物:
Preon：「我送過一盒雞蛋，收就收過Tempo紙巾。」
同行嘅Alice表示：「紙巾係我送。」而Alice就收過M巾(衛生巾)：「好實用呀！」
$100budget抽獎禮物最common:
Tiffany：「我送過拖板畀人，收過幾卷廁紙。」
Janet覺得收到嘅鍵盤清潔掃最唔等使。
陳小姐收過A4紙，佢話：「好無奈、好重，仲要搬返屋企。」慘慘豬囉。
阿龜就話係鮑魚刷，仲話成日都收到杯，啲朋友聖誕又係送杯，生日又係送杯。
Micky就送過啲唔會玩嘅公仔俾人，即係咩？原來係膠恐龍！仲要冇牌子。
$200 budget抽獎禮物:
兩嚿水照計都可以買到份唔錯嘅禮物，點知梁先生話佢抽到嘅禮物係一隻鞋(左腳)，人哋就抽到另外嗰隻。佢冇介意，仲話係人哋一番心意。
啲friend咁有創意，收到咩禮物都笑餐飽啦！聖誕果然係一個開心嘅節日喎。